Ieu maitot !!!!

Misoginia occitana | Octòbre 15, 2010

La plaça de la femna dins la societat medievala occitana es mitica : respectadas, podrián èsser trobairitz, … Pertant, Occitània es coma la majoritat de las societats umanas : misogina. Iò vesem plan, emb las chançons tradicionalas. Lo perdeque de las chançons de maumaridada ? De segur, lo maridatge forçat. Lo recuelh Ai vist lo lop dau conservatòri de Limòtges es plen de la violéncia quotidiana facha a la femna : batuda, forçada, mespresada. Comprene pas perque contunhem d’utilizar un tau repertòri. La sola chançon un pauc feminista que coneisse nos ven dau Bearn : Hilhas, n’aimatz pas tant los òmis.

La lexicografa Josiana Ubaud s’ataquet dins Escrichs sus lei femnas, Escrichs de femnas au vocabulari occitan de depreciacion de la femna. 127 paginas de mots de mespretz contrabalançats per los textes de poetessas occitanas. Un còp de mai l’Ubaud se vai far daus amics. Perque, dins son introduccion, parla de la societat occitana mas tanben de l’occitanisme. Misogine l’occitanisme ? De segur… Coma lo demai de la societat. A n’autres, òmes que nos disem progressistas, de chamnhar nòstre rapòrt a las femnas. Dins nòstres biais de parlar, de viure, mai dins nòstra vesença de çò que devem èsser.

D’escotar, l’entrevista de Josiana Ubaud sus Ràdio País :

http://www.radio-pais.com/plugins/content/dewplayer.swf?son=http://www.radio-pais.com/images/stories/reportages/josianaubaud.mp3&autoplay=0&autoreplay=0

Advertisements

3 Comentaris »

  1. Qu’aurié podut estar un article de l’OLC ! Mes non, qu’es un article de Maime, un article d’un òmi ! E es enqüèra mielhor quan vosautes tanben vos senteishetz concernats ! Mercés e osca !!
    Lo poton a la familha tant qu’i soi ! 😉

    Comentari per Occitaneta — Octòbre 15, 2010 @ 8:03 del tantòst

  2. Se cal totjorn malfisar dels racorcits istorics ! Lo fach que la femna aristocrata occitana del sègle 12 agèsse agut quasi los meteis dreches que los òmes pròva pas res sus la condicion de la femna de classa mai bassas a la meteissa epòca e encara mens sus l’estatut de la femna als sègles 18 e 19, epòca de que datan la màger part de las cançons citadas… ça que la me sembla que la societat medievala occitana (que a pas grand causa a veire ambe la societat « tradicionala » occitana del sègle 19) dins son ensemble e tot en tenent compte de la diversitat micro-geografica de l’epòca, èra una de las mai avançadas (benlèu la mai avançada) per rapòrt a l’estatut de la femna, del josiu o de l’eretic… d’alhors ne’n paguèt lo prètz… D’aqui a far de generalitats sus lo femenisme occitan… cal pas tot mesclar ! Cap de pòble ten lo monopòl de l’inteligéncia o de la bestièsa non?

    Comentari per Rasquinhòl — Octòbre 15, 2010 @ 11:31 del tantòst

  3. Volia pas far de racorcits istorics. Volia parlar d’auei. Auei, dins l’occitanisme, vesem lo periòde medievau coma un periòde de referéncia mai que mai per çò qu’es de la tolerància. Pertant, la misoginia exista ben dins l’occitanisme e dins la societat occitana. Las chançons que parlava son daus segles 18 e 19 mas eran totjorn chantadas dins la segonda partida dau segle 20, quand fugeren collectadas, emai, auei, fan partida daus repertòri oficiau dau conservatòri. Auriam pogut ne’n tirar quauqu’unas tot-parier. Coma « La volia bicar ». Me rapele pus exactament mas balha quauquaren coma : la volia bicar, ela volia pas, un còp de biron, ‘la disia pus ren… Los occitans son pas piegers mas son pas melhor que los autres tanpauc. Alaidonc, n’i a quauquaren de far.

    Comentari per Maime — Octòbre 18, 2010 @ 2:41 del tantòst


Laissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Google photo

You are commenting using your Google account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s

%d bloggers like this: