Ieu maitot !!!!

Me lance dins l’aventura

Quò fai un brave temps que sei pas vengut de per aquí. Après un periòde un pauc complicat dau punt de vuda personau, complete ma novela vita per una novela acitivitat professionala (òc-plan, queu bilhet se pòt veire coma un publireportatge).

Me lance dins l’aventura editoriala (de segur electronica, sei pas un blogaire per ren). Entau, vau prepausar au monde de se ‘bismar los uelhs sus lors tauletas, esmartfòn e autre escran en tut legir daus libres en occitan (mas tanben en francés).

E coma queu bilhet es publicitari, vos bote los tres titres desjà disponibles (fuec de Dieu !) :

null

De visitar : lo sit en francés e occitan mai lo blòg en francés e occitan.


Mandat dins ieu,libre

Passion, Grace and Fire

Febrièr 27, 2014
1 comentari

Me rapele pus, coma, n’i a vint ans de temps, quela casseta ‘ribet dins ma chadena. Tres guitarras que boiravan jazz, flamenco e ròck. Tres guitarras que me fagueren raibar, que m’acompanheren la nuech, lo casque sus l’aurelhas, per m’endurmir.

L’ai surtida n’i a gaire, per me la tornar botar. E auei, la guitarra que de quela casseta me menet
d’acianta au país de mos aujòus, a la descuberta d’un bocin de lor cultura, s’es plantada au Mexic.

Lo flamenco l’ai descubert vertadierament mercés a Paco. Mercés a quela casseta.
L’aviá ‘chaptada per lo jazz, probablament. Benleu per auvir McLaughlin. Mas la descuberta fuguet essenciala.
Una musica essenciala, essenciala a ma vita, tant coma lo jazz o las musicas afrocaribas.


Mandat dins ieu,musica

La question lingüistica dau divendres : traucar e trauchar

Març 29, 2013
1 comentari

Quand dise a mon pitit « balha-me la man, nos vam traucar la rua », ai totjorn un dobte. Sabe que los dos mots existen : traucar e trauchar. Mas loquau utilizas-tu, te, char lector ?


Mandat dins ieu,lenga

Dimars 28 d’aust : La Calandreta Lemosina atacada un còp de mai

Febrièr 20, 2013
Daissar un comentari

Tresesme e darrier article de ma retrospectiva de 2002 mercés aus article qu’escriguei per lo Jornalet, categoria « actualitat lemosina« .

La setmana passada, v-onze personas an depausats ‘na requesta au tribunau administratiu de Limòtges per contestar la subvencion atribuïda per la region Lemosin a la calandreta locala. Sostenguts notadament per la Libre Pensée, contestan los 47 000 euros acordats a l’escòla au nom dau principi “credits publics per l’escòlas publicas”.

Lo president dau Conselh Regionau, Jean-Paul Denanot, susprés per la requesta, declaret que “la region es signatària de la charta per lo manten de las lengas regionalas e qu’es per quò que subvenciona la Calandreta dempuei fòrça annadas. Un tal acharnament contra una associacion laïca, que la mission es reconeguda e legitima, es incomprensible”.

D’efiech, la Calandreta Lemosina pareis èsser la cibla de la Libre Pensée dempuei mai d’un an. Quela associacion jacobina e anticlericala sostenguet antan los parents de l’escòla de Landoja que s’opauseren a l’auberjament provisòri daus calandrons dins los locaus de l’escòla dau borg. Landoja, tradicionalament sonat Sent-Marçau, es un vilatge dependent de Limòtges. La merariá aviá decidit a la rentrada passada de lojtar dins una partida desafectada de quela escòla los calandrons, privats de lors locaus abituaus per un auratge violent. L’oposicion d’una partida daus parents viret a l’afrontament ideologic.

Un còp la Calandreta Lemosina tornada dins un bastiment privat, sos opausants s’atacan a sa sorsa de finançament. L’objectiu, si es pas clarament dich, sembla totparier èsser la disparicion de la sola escòla primària bilingüa occitan-francés de l’academia.

Maime Caillon


Mandat dins ieu,premsa

La question lingüistica dau diluns : « croque-monsieur »

Febrièr 18, 2013
6 Comentaris

Veiquí una novela rubrica dins mon blòg : la question lingüistica dau diluns. Que sirà benleu la dau dimars o dau dimecres la setmana que ven. Qu’es un pauc dins la mesma ideia que las descripcions que comencei de far de mon environament. Adonc, t’explique.

Dissabde de ser, eram a minjar en familha. E ma mia me pauset la question fatidica : « Comment tu dis croque-monsieur en occitan ? » Sabes que ? Lavalada deu pas ne’n minjar. N’i a ben lo cròca-mòrt dins son diccionari mas pas lo croque-monsieur. Adonc, coma iò dire ? Coma los gascons e lor « cracamossur » ? Me sembla la melhor solucion : cròca-monsur. Perque « entrepan chaud au fromatge » me sembla long, fòrça tròp long. E te, coma diriàs-tu lector dau Lemosin o d’alhors ?


Mandat dins ieu,lenga

Divendres 1er de junh 2012 : dos ecologistas au govern

Febrièr 16, 2013
Daissar un comentari

Segond article de ma retrospectiva 2012 dau Jornalet, categoria “opinion”.

Cécile Duflot, secretària nacionala d’EELV, es ministra de l’Egalitat daus territòris e dau Lotjament

François Hollande ganhet l’eleccion presidenciala francesa lo 6 de mai passat e son prumier ministre, Jean-Marc Ayrault, formet un govern emb los partits politics qu’avián un acord emb lo PS: Euròpa Ecologie Los Verds e lo partit daus radicaus de mança. Adonc, dos ecologistas i participan: Cécile Duflot, secretària nacionala d’EELV, coma ministra de l’Egalitat daus territòris e dau Lotjament mai Pascal Canfin, especialista de l’economia verda, ministre delegat au Desvelopament – lo daus país dau Sud. Lo ministeri de l’Ecologia, dau Desvelopament duradís e de l’Energia (MEDDE) fuguet balhat a Nicole Bricq, anciana vicepresidenta de la comission de las finanças dau Senat marcada au PS. L’an pas balhat a un ecologista per doas rasons. D’en prumier, los ecologistas vòlon mostrar que son capable de gerir d’autres domenis que lo de l’ecologia. Puei perque l’energia fai partida de las competéncias dau MEDDE, energia mai que mai nucleara en França.

Quala serà lor influéncia sus la politica governamentala? Podem supausar que la lei de decentralizacion venenta serà l’òbra de la ministra de l’egalitat daus territòris. Podem esperar qu’i metrà un pauc de las ideias de son partit: mai de poder per las regions e una plaça per las lengas dichas regionalas. De veire çò que farà de las metropòlis dau projecte de Sarkozy, qu’Hollande era pas contra. Per lo demai – l’ecologia, la santat, los transpòrts, l’energia – podem mas esperar en la fòrça de persuasion daus dos ministres e daus parlementaris ecologistas que seràn elegits en junh.

Coma ecologista occitan, serai attentiu a quauques punts precís de la politica governamentala:
– la seguda balhada aus permés d’exploracion e d’expleitacion daus gas e òli d’eschiste que l’acòrd PS/EELV prevei d’abrojar
– los transpòrts mai que mai ferroviaris e los arbitratges entre las LGVs e los liasons localas (TER, transpòrts urbans) per çò de la participacion financiera estatala tras una estructura novela « France Infrastructures »
– lo nuclear perque Hollande sembla pas voler respectar l’acòrd PS/EELV en barrar nonmàs la centrala alsaciana de Fàssene
– la gestion de la sauvatgina, perque tant lo lop qu’es a se tornar installar en Occitània dempuei Itàlia coma l’orsa pirenenca pausan la question de l’equilibri entre proteccion de la biodiversitat, activitat pastorala e torisme mai la de las cooperacions transfrontalieras entre occitans.

Tornarai sus quilhs punts quand l’actualitat zo necessitarà o per far lo bilanç de la participacion ecologista au govern francés.


Mandat dins ieu,premsa

Dijòus 26 d’abril 2012 : Chadenas umanas contra lo nuclear

Febrièr 6, 2013
Daissar un comentari

Prumier article de ma retrospectiva 2012 dau Jornalet, categoria « informacion generala ».

Cadena umana de Lion a Avinhon contra l'energia nucleara l'11 de març a Valença

Lo 26 d’abriu es la jornada internacionala de commemoracion de la catastròfa nucleara de Chornobyl

Ujan, lo malhum Sortir du nucléaire apela a formar de las chadenas umanas de pertot en França.

Lo 11 de març passat, un an apres l’accident nuclear de Fukushima, los antinuclears avián reüssit a mobilizar pres de 60 000 personas per far una chadena umana entre Lion e Avinhon. Per l’anniversari de la catastròfa de Chornobyl, vòlen contunhar quela mobilizacion en esperar l’amplifiar e pesar sus lo debat politic entre los dos torns de l’eleccion presidenciala. Apelan a de las accions de pertot en França dau 26 au 29 d’abriu. Mai d’una centena son prevudas. Entau de las chadenas umanas se faràn notadament dins de las vilas occitanas (Aubenàs, Lo Puèi de Velai, Montpelhièr, Tolosa, Tula, Tolon, …) e a l’entorn daus sits nuclears de Golfuèg e de Cadaracha.

Coma la jornada es internacionala, de las manifestacions se faràn tanben dins d’autres país. Entau, los ecologistas s’amassaràn davant lo ministeri japonés de l’Economia, dau Comerci e de l’Industria a Tòquio per demandar l’arrest dau nuclear dins l’archipel. Au Canadà demandaràn la barradura de la centrala de Darington sus lo lac Ontàrio. En Alemanha e en Àustria, se mobilizaràn contra las centralas nuclearas checas e slovacas, pròchas de la frontiera. Dins 9 autres país se debanaràn conferéncias, velhada emb de las bogias, projeccion de filmes. L’impacte de quelas mobilizacions sus la politica energetica mondiala, quitament apres dos accidents nuclears màgers, demòra mausegur.

Maime Caillon


Mandat dins ieu,premsa

Lo bureu

Febrièr 2, 2013
Daissar un comentari

Per la prumiera descripcion de mon environament, començarai per lo bureu ente sei. Adonc, sei sietat sus ‘na chaira davant mon oridnator. Pita descripcion de l’ordinator : un ecran, un clavier, una unitat centrala, una soriç e son tapis, una imprimanta e sas cartochas, doas caissas acosticas – de las bafles que – e un casque. L’imprimanta fai escanèr. Sus lo mueble d’ordinator n’i daus libres, un aparelh de fòtos numeric. Darrier me un armari, una taula e un ferre per repassar, un canapè, una pita biblioteca. N’i a tanben un placasson, un chambron ? Sabe pas coma l’apelar. Emb daus bilhaments dedins, e la box per Internet.

Quauquas remarcas. Utilize « sietat » pusleu que « siclat », que nos balha lo Thesoc sus Cosés, per abituda. Per la soriç de l’ordinator, Lavalada balha rateta, mas coma los gascons de Per Noste balhen « soritz », prenguei quela solucion. Imprimanta es un francisme, en occitan deuriá èsser imprimidoira. Las caissas acotiscas, las bafles, qu’es enqueras surtit dau diccionari de Per Noste. Me sembla que l’anglicisme (que ne’n siriá un) es melhor. L’aparelh de fòtos, l’ai trobat sus lo lexic de la novelas tecnologia dau Termcat. La taula (enfin la tabla segon lo Thesoc) e lo ferre per/de repassar qu’es enqueras un manleu aus gascons. Coma disetz v’autres ? E vesetz çò qu’es mon placasson/chambron ?


Mandat dins ieu

Retrospectiva 2012

Genièr 31, 2013
3 Comentaris

Sabes benleu que participe dempuei la debuta a l’aventura dau Jornalet, un jornau participatiu e quotidian en occitan. Quò te semblariá benleu dau rempliment, mas te vòle prepausar una retrospectiva de mos articles los mai legits (dins tres categorias : ma cronica ecologista, l’actualitat lemosina e generala). Oc-es, t’as rason, qu’es dau rempliment mai de la reclama per lo project dau Jornalet. Assume. Mas espere que quò t’interessaràs totparier !


Mandat dins ieu,premsa

Kò te tà ?

Genièr 27, 2013
3 Comentaris

Lector, sabes qu’ai un pitit qu’a aura dos ans demiá. E si iò sabiá pas, aura sabes. Eu comença de parlar, mai que mai en francés mas compren ben l’occitan. E s’interessa de mai en mai a son environament. E me demanda « kò te tà ? » suvent. Mais que suvent. Tot lo temps ! E quò vòu dire : « que qu’es quò ? » E coma li vòle parlar mai que mai en occitan, ai un problema daus beus. Sei capable de parlar de la matèria de Bretanha dins la literatura medievala occitana o de l’amudiment de las cosonantas finalas en occitan lemosin mas pas de descriure a mon filh nòstre environament. Adonc, ai decidat d’utilizar queu blòg. L’i vau descriure chasca peça de ma maison e çò que n’i a dedins per me preparar a la Question !

Utilizarai lo vocabulari dau Thesoc, mai que mai los mots de Cosés, perque ne’n sei a quauquas centenas de metres. De segur, quand n’i aurà pas lo mot que cerche, visarai lo qu’es lo mai utilizat en Nauta Viena. Si tròbe pas, surtirai de mon iperlocalisme per ‘nar veire sus los diccionaris e lexics dau Congrès si dins çò que balha lo Lavada n’i a pas una solucion panoccitana.

Mas aurai mestier de ton aida, lector. Per me dire si comprenes tot, si utilizas d’autres mots, çò que tu ne’n pensas. Començarai leu leu.


Mandat dins ieu
Pagina seguenta »