Ieu maitot !!!!

Exercici d’estile

Junh 21, 2013
5 Comentaris

Vos vau parlar un pauc de lenga, d’estandardizacion o al mens de çò que ne compreni. Vos vau parlar d’occitan general. En parlar amb lo Domergue Sumien, ai comprés que la creacion d’un occitan estandard es pas una reduccion a un parlar particular o una reduccion del vocabulari. L’occitan estandard pluricentric es un occitan composit, fach amb de causidas normativas de segur, per çò de la gramatica, per çò del vocabulari. Es un occitan amb diferents gostes : auvernhat, gascon, lemosin, lengadocian, nissart, provençal, vivaroalpenc. 

Prengam lo vocabulari. Prengam lo mot « chin ». Aqueste mot a de variantas dialectalas : chin, chen. Ne fal causir una per l’occitan estandard. Aquò serà « chin ». Aqueste mot a maitot de sinomims mai o mens frequents o coneguts : can, gos, perre. E tots son valids per l’occitan estandard. « Gos » se ditz pas en Lemosin e « perre » es rare ? Tant pièg. L’occitan estandard es pas un parlar localizat adonc pren lo vocabulari de tots los parlars, manca los francismes inutils.

Vaquí çò qu’es malaisit : la causida entre las formas dialectalas e los francismes. Es lo trabalh dels linguistas de far d’un costat lo recensament de çò qu’existís e de l’autre la causida per la lenga estandard – per que per lo parlar de tots los jorns, amb lo vesin, lo petit, per la poesia amb lo ritme lemosin o vivarés, lo parlar local, amb sas causidas, ligadas a l’usatge es çò que fal.

Finalament, es plan acepte d’escriure en occitan estandard. Per exemple en occitan general (lo qu’a lo gost lengadocian). Sufís d’escriure dins son parlar puei de modificar qualques conjugasons, qualques formas gramaticalas, e de lengadocianizar lo vocabulari. Qu’es çò que veni de far amb aqueste tèxte. Un exercici d’estile. Avetz reconegut lo lemosin jos la pintura lengadociana o semblava de lengadocian vertadier ? Perque, o fal saber, coneissi de parlar lengadocian.

Tornarai escriure en occitan estandard, amb d’autres gostes. Per veire çò que balha. Mas totjorn en partant de mon parlar lemosin. Ne’n coneissi pas d’autre.


Mandat dins lenga

La question lingüistica dau divendres : traucar e trauchar

Març 29, 2013
1 comentari

Quand dise a mon pitit « balha-me la man, nos vam traucar la rua », ai totjorn un dobte. Sabe que los dos mots existen : traucar e trauchar. Mas loquau utilizas-tu, te, char lector ?


Mandat dins ieu,lenga

La question lingüistica dau diluns : « croque-monsieur »

Febrièr 18, 2013
6 Comentaris

Veiquí una novela rubrica dins mon blòg : la question lingüistica dau diluns. Que sirà benleu la dau dimars o dau dimecres la setmana que ven. Qu’es un pauc dins la mesma ideia que las descripcions que comencei de far de mon environament. Adonc, t’explique.

Dissabde de ser, eram a minjar en familha. E ma mia me pauset la question fatidica : « Comment tu dis croque-monsieur en occitan ? » Sabes que ? Lavalada deu pas ne’n minjar. N’i a ben lo cròca-mòrt dins son diccionari mas pas lo croque-monsieur. Adonc, coma iò dire ? Coma los gascons e lor « cracamossur » ? Me sembla la melhor solucion : cròca-monsur. Perque « entrepan chaud au fromatge » me sembla long, fòrça tròp long. E te, coma diriàs-tu lector dau Lemosin o d’alhors ?


Mandat dins ieu,lenga

Bulit

Junh 16, 2011
1 comentari

Ben, me, parle lemosin ! Aidatz-me ! Aprenetz l’occitan !



Bulhit [Incurable]


Mandat dins lenga,video

Aus GasCONs e LengadoCHIANTs

Març 18, 2011
7 Comentaris

Aus GasCONs que vòlen pas auvir un autre dialecte perque lor dialecte es una lenga e pas de l’occitan, aus lengadoCHIANTs que cresen d’enguera que l’occitan referenciau dau lingüista gascon Pèir Bec es lo parlar de lor vilatge dau Lengadòc-bas, demande de legir l’estudi de tres scientifics galecs de l’Universitat de Sent Jaume de Compostela qu’explica qualas lengas dins una situacion diglossica pòden subreviure. « Quò ‘riba nonmàs ente n’i a un grope bilingüe estable, e qu’es possible nonmàs si las lengas en competicion son sufisament similaras (…) ». Alaidonc, per la subrevita de l’occitan, fau se botar au nòrd-occitan, sinon, qu’es fotut !!!


Mandat dins conarias,lenga

Dictada occitana

Genièr 25, 2011
4 Comentaris

La dictada occitana se debanarà lo 29 de genier 2011.

A Limòtges :
14h : dictada per los beus (Jan Picatau de Sent Barrancon – texte d’Enric Delaja dich Contaviòrla – legit per Jan-Francés Vinhau)
16h-16h30 : conte « L’istoiras de Jan Picatau » per Jan-Claudi Jarric
16h45 : dictada daus pitits

Entrada liura a gratis
Per se marcar : Librariá occitana – 05 55 32 06 44

A Selhac :
10h30 au collegi de Selhac
Per s’inscriure , telefonar au collegi : 05 55 27 01 60

Ai pas d’informacions sus çò que se fai en Charanta.


Mandat dins lenga

Misoginia occitana

Octòbre 15, 2010
3 Comentaris

La plaça de la femna dins la societat medievala occitana es mitica : respectadas, podrián èsser trobairitz, … Pertant, Occitània es coma la majoritat de las societats umanas : misogina. Iò vesem plan, emb las chançons tradicionalas. Lo perdeque de las chançons de maumaridada ? De segur, lo maridatge forçat. Lo recuelh Ai vist lo lop dau conservatòri de Limòtges es plen de la violéncia quotidiana facha a la femna : batuda, forçada, mespresada. Comprene pas perque contunhem d’utilizar un tau repertòri. La sola chançon un pauc feminista que coneisse nos ven dau Bearn : Hilhas, n’aimatz pas tant los òmis.

La lexicografa Josiana Ubaud s’ataquet dins Escrichs sus lei femnas, Escrichs de femnas au vocabulari occitan de depreciacion de la femna. 127 paginas de mots de mespretz contrabalançats per los textes de poetessas occitanas. Un còp de mai l’Ubaud se vai far daus amics. Perque, dins son introduccion, parla de la societat occitana mas tanben de l’occitanisme. Misogine l’occitanisme ? De segur… Coma lo demai de la societat. A n’autres, òmes que nos disem progressistas, de chamnhar nòstre rapòrt a las femnas. Dins nòstres biais de parlar, de viure, mai dins nòstra vesença de çò que devem èsser.

D’escotar, l’entrevista de Josiana Ubaud sus Ràdio País :

http://www.radio-pais.com/plugins/content/dewplayer.swf?son=http://www.radio-pais.com/images/stories/reportages/josianaubaud.mp3&autoplay=0&autoreplay=0


Avenidor

Agost 30, 2010
6 Comentaris

Auve suventas vetz, que los occitanistas son nonmas daus professors, daus còps un pauc copat dau monde. E l’occitan auria mestier de militants dins la vita, per l’i far viure la lenga. Mas los dos son liats. Daus profs perdeque far ? Per transmetre la lenga, que l’es pus dins l’encastre de la familha. E los escolans ? De segur, an mestier d’un environadís ente la lenga viu. Mas quel environadís, avem de iò crear. Qui ? N’autres, que parlem. Per los escolans que venen, que trobaren un espaci d’expression per lor occitan. Per que pueschen, ilhs tanben far viure la lenga. Mas qual es l’objectiu priond de tota quela machina a far parlar l’occitan ? Sauvar la lenga, de segur. La reviscolar en reviscolar la transmission familiala. Un raibe mai un desfis enòrme per tots los qu’an apres l’occitan. Per me, dempuei la debuta dau mes d’aust, queu desfis se ‘pela Guilhem.


Mandat dins ieu,lenga

MOVIM : platafòrma sociala liura

Abriu 13, 2010
1 comentari

Coneissetz lo malhum sociau MOVIM ? Non ? Normau ! Per lo moment, qu’es nonmas un project de malhum sociau au còdi font dubert e descentralizat. Una mena de Facebook emb mai de foncionalitats. « Còdi dubert » vòu dire que tot lo monde pòt l’utilizar per crear son malhum sociau, lo modifiar, l’installar de pertot. Descentralizat vòu dire qu’es n’i a pas qu’un servidor qu’a totas las donadas de tot lo monde, coma per Facebook. Enfin, ilhs deven ne’n aver mai d’un, de segur, mas son tots chas Facebook, aus Estats-Units. Emai Facebook se’n pòt servir comercialament. Alaidonc, n’i aurà mai d’un servidor, chascun podrà ne’n far un per auberjar sas donadas o ben utilizar un servidor de fiança. MOVIM a un autre interest per los internautas occitans : serà en occitan. Aüei, Facebook es pas en occitan emai refusarià de laissar far la traduccion dins quela lenga. Auriàn totjorn pas respondut a las demandas daus utilizaires. Adonc, lo sol malhum sociau en occitan es Charrada. E leu leu, MOVIM.

Mas MOVIM es nonmas un project. Los pitits jòunes qu’agueren l’idéia an mestier d’aida. An mestier de programaires mas tanben de reviraires. E dins totas las lengas ! Perdeque far ? « Perque un programaire s’interessarià mai a un project qu’es dins sa lenga mairala. » Per lo moment, la presentacion dau project es en : alemand, anglés, espanhòu, francés, italian, occitan. Esperen vòstra aida.


Mandat dins amics,lenga,revolucion

Rescontre montpelhierenc

Març 8, 2010
5 Comentaris

Benleu zo sabetz, me sei marcat a la famosa licéncia d’occitan de l’universitat de Montpelhier III. Fuguet fòrça complicat, fòrça long… e aura ai tot plen de trabalh de far !!!

Divendres passat, n’i aviá lo rescontre estudiant-professor. Sabes, coma au collegi, quand ta mair ‘nava veire lo prof de mate, la prof de francés e que tornavas maison la testa clafida de « Te fau trabalhar mai ! Surtiràs pus lo dissabde aprep-miegjorn ! Te vau paiar daus cors particulars ! ». E coma son daus cors per correpondéncia, sabes pas coma son los profs. T’imaginavas lo prof d’istòria, grand, blond, jòune, musclat. La prof d’occitan medeviau p’ita, redonda e vielha. La prof de practica de la lenga sexy, forçadament… N’i ‘gut quauquas suspresas e decepcions… Forçadament, t’aviás pas far tot los devers dau prumier semestre. Pas d’istòria, pas de dialectologia, pauc de literatura…

Lo rescontre fuguet riche de surpresas. La prumiera : sei lo mai jòune daus estudiants ! La segonda : trabalhe beucòp (oc-es qu’es lo prumier còp qu’un prof me ditz que trabalhe beucòp…). La tresesma : un prof dau departament d’occitan de l’universitat Montpelhier III se noirís essencialament de kebab e autre kefta. Quò me vai, la harissa quò me plai !!

Sabe pas si passaràn sus mon blògue (en fach espere que non…) mas voldriá mercejar los profs per lor acuelh, la discutida qu’avem ‘gut, la vesita de Montpelhier per los (enfin las) que m’an guidat dins ‘quela vila desconeguda. E sei plan content d’aver rescontrat los autres estudiants. Espere lo mes de junh per tornar veire tot queu pitit monde (e passar los examens maitot… mas finalament, sabe pas si qu’es lo mai important !!!).


Mandat dins amics,conarias,ieu,lenga
Pagina seguenta »