Ieu maitot !!!!

Poesia de femnas

Febrièr 13, 2010
Daissar un comentari

Arser, era a la librariá occitana de Limòtges per de las lecturas de poemas. Daus poemas de femna. Quatre femnas eran ‘quí, quatre univers fòrça diferents. Laia la catalana e son escriptura d’umanitat, frescha, joiosa, sensibla. Benedicta la lemosina e son viatge dins ‘queu país verd e priond. Aurelia la lengadociana e sa poesia charnala. Nadine, l’autra lemosina, e son crit per la lenga occitana que raja dau fond de son còr.

Un moment d’emocion fòrta, d’eschamnhe, que pòde ‘mas exprimar emb un poema de Laia.

Cull el fruit de la meva veritat,
una magrana oberta
com una riallada
de criatura
de dentetes petites
i desiguals:
cada fragment
de la meva certesa.

Si a poc a poc
la prens i te la menges,
el gust de mi voldrà estimar-te
com jo t’he volgut estimar:
sembrant-te el paladar
i acollint-se en el ventre.
Fins que s’empelti en el teu arbre
i jo pugui prendre de nou
el fruit de tu
i, a poc a poc, menjar-lo.

Per los que comprenen pas plan lo catalan, ne’n veiquí ‘na temptativa de revirada.

Culís la frucha de ma veritat,
una granada dreibida
coma ‘n’espofidada
de mainatge
de ratòtas p’itas
e inegalas :
chasque fragment
de ma certituda.

Si brin a brin
la prenes e te la minjas,
lo meu gost te voldrà aimar
coma me te volguei aimar:
te semnant lo palet
e se refugiant dins ton ventre.
D’aicianta que s’empeute en se ton aubre
e ieu puescha tornar prener
la toá frucha
e, brin a brin, la minjar.

Advertisements

Mandat dins ieu,lenga,poesia

Dictada occitana 2010

Genièr 12, 2010
3 Comentaris

La 13esma dictada occitana se debana lo 30 de genier dins 42 vilas d’Occitània e de Catalonha. En Lemosin, quò se passarà a la Biblioteca Francofòna Municipala de Limòtges, a Charreç en Charanta e au collegi de Seilhac en Corresa.

A Limòtges, quò serà la Monica Sarrasin que legirà un extrach de son libre La Lison dau Peirat (de tornar legir davant la dictada…) e lo Jan-Francés Vinhau per lo correccion.

Per se marcar, fau telefonar a la librariá occitana de Limòtges : 05 55 32 06 44.


Mandat dins lenga

Auvetz, auvetz, braves Limotjauds !

Novembre 21, 2009
Daissar un comentari

Super Occitan, lo grand defensor de la causa occitana, es tornat dins la capitala lemosina ! En pausar simbolicament un paneu en occitan a l’entrada de Limòtges, eu vòu rapelar que n’i a ‘na campanha per demandar la sinhalizacion bilingüa frances-occitan dins ‘quela vila.

Avem mestier de vòstre sostenh. Podetz signar la letra au mera en linha sus : http://arrilemosin.free.fr/limotges/.

Super Occitan vos ne’n merceja !


Mandat dins amics,lenga

Dissabde a Carcassona

Octòbre 23, 2009
5 Comentaris

Coma fòrça monde, serai a Carcassona dissabde que ven (oc-es qu’es deman…).

Char lector, benleu nos l’i veirem ! Per me coneisser qu’es plan simple : parle lemosin, sembla, segon ton passiu culturau a Asterix, José Bové o un tipe dau Village People (subretot emb lo casque de chantier, mas l’aurai pas, trabalhe pas las dimenjadas !!), portarai un brave chamison Arri ! roge jos mon pull.

Serai dins lo cortègi de Gardarem la Tèrra emb la fanfara daus Goulamas’K (e benleu un pauc emb la delegacion lemosina e ‘nirai veire los pitits de Libertat). Serai coma la Clara de segur (si ‘la part pas coma un daus musicians dau Goulamas’K, lo trompetaire/acordeonista per exemple…).

Me trobarà a la fin de la manifestacion a un taulhier d’un productor occitan a chantar « Anem Òc, per la biera occitana » o a lo de MXL87 (l’ai totjorn pas lo chamison banturle !!). E de ser, espere anar a Villagalhenc (char lector si t’as ‘na veitura emb doas plaças voidas e que tòrna a Carcassona aprep la festa a Villagalhenc, vòle plan l’i ‘nar coma te !!!)

(per los qu’aniran sus lo site d’Arri !, n’i a ‘na fotò d’un tipe en chamison Arri ! roge… qu’es me…)


Mas qui es Super-Occitan ?

Octòbre 6, 2009
7 Comentaris

Trauchant la nuech, Super-Occitan, lo famós subre-eròs, tornet aparéisser dins un cafè limotjaud dissabde de ser. Defendent la lenga mespresada, Super-Occitan era vengut liberar Limòtges dau carcan franchimand per lo bilingüisme sinhaletic ! L’unica fòto dau subre-eròs fuguet presa per ‘na jòuna femna tota desvirada.

‘Ribant ni de çai, ni de lai, fugissent ne sai ente, Super-occitan es lo mistèri mager d’Occitània. Mas qui es Super-Occitan ? D’ente ven ? Serà a Carcassona ? Degun iò pòt dire…


Mandat dins amics,conarias,lenga

Limòtges en occitan

Setembre 16, 2009
Daissar un comentari

Lo dissabde 3 d’octòbre 2009 a 21:00, Arri! te convida a ‘na novela serada sus lo tema « Limòtges en occitan » au cafè L’Amicale des Parachutistes Belges, rua Charles Michels, a Limòtges.

‘Quela serada marcarà la debuta d’una campanha per la sinhalizacion bilingüa Occitan/Francés dins la vila de Limòtges.

Quò sirà l’enchaison de bringar a l’occitana, en musica, de saborar de quauquas especialitats d’aquí, e d’aprener quauques mots dins la linga dau país.


Mandat dins amics,lenga

Pisse un eiriçon emb una permanenta

Agost 26, 2009
5 Comentaris

La setmana passada, fuguei au concert dau Duo GanschBreinschmid a Limòtges. Un duò trompeta-contrabassa daus bons. ‘Na musica jazzy, vienesa mais balcanica mas subretot daus musicians franc fadards ! Qu’era geniau !

Thomas Gansch nos aprenguei ‘n’expression de chas se, dins son dialecte alemand d’Àustria : i schiff an Igl mit Dauerwelln. Qu’es ‘n’expression d’utilizar quand tu ses susprés, estonat coma quand tu veses las p… euh… los pès de Melania per lo prumier còp, lo darrier chamison MXL87 o la darriera creacion de l’OCLC. La revirada en anglés facha per Georg Breinschmid es : I pee a hedgehog with longlasting waves. Quò balha en occitan : pisse un eiriçon emb una permanenta. Oc-es. Qu’es delicat, rafinat. Son entau los Vienés ! Ne’n fagueren ‘na chançon, e vei-la-quí !

Crese que me la vau gardar ‘quela expression. « Fuec de Diu ! Sei ‘nat a un concert, ier, a ne’n pissar un eiriçon emb un permanenta ! » Qu’es çò qu’auriá pogut dire Coincoin, la canetona lemosina auboissaira, qu’es ‘nat veire lo concert dau Mnozil Brass, ente juega Gansch (de legir son rendut-compte sus son blògue).


Lo conte dau merle e de la merlata

Julh 23, 2009
2 Comentaris

En Lemosin, quand quauqua-ren s’eterniza, disem « quò fai lo conte dau merle e de la merlata ». Lo Jan dau Melhau nos explica perque en tut nos contar queu conte. En occitan mai en frances, d’una lenga l’autra.

http://sa.kewego.com/swf/p3/epix.swf

Conte de Nadau – Ma-Tvideo France3


Mandat dins lenga,video

Fai tot petar miladiu !

Julh 2, 2009
1 comentari

Dempuei quauques jorns, avem, sus los panenus de Molins, la publicitat de ‘na novela bevencha : l’Auvergnat Cola. Bon qu’es un cola, coma sembla au Pepsi e tròbe pas la genciana dedins… Disen que ne’n i a mas bon… Çò qu’es plasent es de veire en gròssas letras de l’occitan sus ‘queu paneu. Perque l’eslogan de ‘quela marca es : Fai tot petar miladiu ! E que s’auva maitot dins la pub per la tele !


Mandat dins lenga,video

Vacanças au País Basc

Mai 11, 2009
1 comentari

Tòrne de mas vacanças au País Basc. Un plan brave país, un retorn a la terra daus aujòus mairaus qu’eran dau Labord. ‘Na terra plan descomplexada de sa lenga mai de sa cultura. ‘Quela setmana, i a ‘gut un acòrd entre Seaska e l’Educacion Nacionala : onze regents de mai per las ikastolak. Normau. N’i ne’n a quasi una per vilatge. E lo monde parlen basc dins las ruas, au subremerchat, au restaurant, … ‘Laidonc, lo bilingüisme seriá possible en territòri jacobin ? Oc-es. Emb daus braves panues bilingües. Perque pas en cò nòstre ? Mas faudrá èsser tenace, perserverant… e parlar occitan, tot lo temps. Te, legidor, que me coneis dins la vita vertadiera, me parle pus en frances ! Benleu, nos faudrá nos forçar per zo far. Mas, los basques zo fan. E sem pas mai (ni mens) colhons qu’ilhs !!


Mandat dins ieu,lenga
« Pagina precedentaPagina seguenta »