Ieu maitot !!!!

Me lance dins l’aventura

Quò fai un brave temps que sei pas vengut de per aquí. Après un periòde un pauc complicat dau punt de vuda personau, complete ma novela vita per una novela acitivitat professionala (òc-plan, queu bilhet se pòt veire coma un publireportatge).

Me lance dins l’aventura editoriala (de segur electronica, sei pas un blogaire per ren). Entau, vau prepausar au monde de se ‘bismar los uelhs sus lors tauletas, esmartfòn e autre escran en tut legir daus libres en occitan (mas tanben en francés).

E coma queu bilhet es publicitari, vos bote los tres titres desjà disponibles (fuec de Dieu !) :

null

De visitar : lo sit en francés e occitan mai lo blòg en francés e occitan.


Mandat dins ieu,libre

Concors de biblioteca

Octòbre 17, 2010
4 Comentaris

La Melania nos mostra suvent sa biblioteca, emb tot plen de libres sabents… Ieu maitot, voliá vos mostrar qu’es tot plen de braves diccionaris !



Emai vesetz pas tot…

Mas, ai pas un ostau tan beu coma lo de la Mela… Sei dins un pitit appartament de centre-vila. Adonc, mos libres son pas totjorn sarrats dins ‘na biblioteca…


Mandat dins ieu,libre

Loudun en Itàlia

Junh 11, 2009
3 Comentaris

Char legidor italian, occitan d’Itàlia o viatjador que passariá per ‘quela peninsula, t’infòrme de la surtida en Itàlia de Loudun, la BD de l’amic Paolo, chas Edizioni BD. Un plan brava BD que parla de çò que se passet a Loudun en 1634. Bon… qu’es pas un libre per los dròlles tot parier… Mas, qu’es istòric ! En França, era surtida chas Soleil.


FestiBD

Març 20, 2009
2 Comentaris

La dimenjada passada, i aviá lo festenau de BD de Molins : FestiBD. ‘Na quarantena d’autors vengueren dins la capitala borbonesa per presentar lor trabalh e far de la dedicaças. Lo public fuguet plan present. Fuguei un daus benevòles emai participei a la jurada dau festenau. Balherem cinq premis :

– melhor album de l’annada a Laurent Libessart per Sphères
– melhor scenari a Sualzo per L’improvisateur
– melhor prumier album a Nicolas Sure per Neverland
– premi de l’illustracion Tatiana Domas per Le secret des lutins
– premi speciau de la jurada a Paolo Armitano per Loudun, qu’aponderem perque quela BD era dins totas las discussions sens ‘ribar a la prumiera plaça per un premi.

La qualitat dau trabalh grafic, l’ambient creat per lo negre mai lo roge, deviá esser recompensat.Lo conselh generau daus jòunes de l’Alier balhet lo premi jounessa a Mathilde Domecq per Basile et Melba. Me, auriá volgut balhar un premi a la Soph‘ per son Ze plus beau métier du monde mas son trabalh plasiá pas a ‘na partida de la jurada.

‘Queu festenau fuguet per me l’enchaison de rescontrar daus autors que coneissiá pas (Niko Henrichon, Laurent Libessart, Sti, Tarek, Arnoux, Tatiana Domas, Sualzo, Paolo Arminato, Amandine, Tomatias, Batist, Tota, Kraehn, …) coma d’autres que segue dempuei d’annadas (Caritte e Druilhe). Tots fugueren plan simpatics e passeren daus moments daus grands a taula coma apres, a l’open bar de l’ostalariá.

Un grand merces a tots ‘quilhs autors mai aus autres benevòles per ‘quela subredimenjada quitament se parlen pas occitan e que van pas comprener mon texte…


Mandat dins amics,ieu,libre

Soleu roge

Octòbre 20, 2008
Comentaris tampats sus Soleu roge

Dimecres, ‘chabei un libre de Carles Camprós. Auve la Melania… Legisse d’enguera un vielh chause. E òc ! Qu’es entau, qu’es pas autrament. Un recuelh publicat en 1984 de novelas escrichas entre 1939 e 1949. Parlan dau país d’Usès, en Lengadòc. Lo país dau Carles. Un país rude, passionat. Un país d’amor, de colèra, de violéncia tragica. L’estile, lo ritme de la lenga de Camprós nos fan viure los sentiments de ‘quelas femnas e ‘quilhs òmes. De segur, nos parlan d’un monde rurau, emb sos còdis sociaus, desaparegut. Mas, chas n’autres, pòples latins e mediterraneus, la desesperança amorosa que nos mena a la folia es eternala.


Mandat dins libre

Aligòt Literari

Octòbre 16, 2008
1 comentari

N’i a quauquas setmanas, trobei un pitit libre sus lo taulier d’un editor audenc. Boris le babylonien contre l’Aligot Littéraire. La remembrença de l’aligòt minjat a l’Estivada ‘queste estiu me faguet salivar. Virei lo libre per ne’n legir lo darrier. Un extrach. Dau ritme, de l’umor. Mas pas d’aligòt. L’autor, un jòune, coma me. Fuguet chaumaire. Coma me. Dreibei lo libre. Quauques mots d’occitan. Revirats en frances. Beucòp de frances. Daus còps revirats en òc. Un pitit glossari plan interessant. Mas totjorn pas d’aligòt !! Lo voliá trobar. ‘Chaptei lo libre. Lo comencei de legir.

Un jòune autor occitan monta a París per trobar Boris, un exilhat, e li presentar un project fadard. Un Oulipo occitan : l’Aligòt Literari. « Qu’es aquò qu’aqueste aligòt ? L’Aligot Littéraire est une invention issue d’un concept très technique. Celui-ci mêle à une évolution linguistique une avancée poétique, entraînées et jugulées par des progrès éthyliques étonnants, ceci en simple application d’un process au marc de raisin fondu et, ce qui est vraiment nouveau : avec une pointe de gras ! » Vei-lo-quí ! L’aviá trobat mon aligòt !

Un occitan perdut dins la jungla literària parisenca, entre vodcà lituaniana, parpalh d’òtessas plan tetonadas, reviscoladors de la Gàllia Narbonesa e un exilhat aparisencat, que passa a la television e que tot lo monde tròban très beau. ‘Na critica dau monde literari en França. Mas ‘na critica facha dempuei Occitània. Emb una occitanitat sens complexe. Un libre qu’es, segurament, de l’aligòt literari, emb sa pointe de gras, e benleu un pauc autobiografic…

Julien Campredon, Boris le babylonien contre l’Aligot Littéraire, Atelier du Gué, Villelongue d’Aude, 2006.

Lo site de l’editor : http://www.atelierdugue.com


Mandat dins conarias,lenga,libre

Contes de Fèlix Arnaudin

decembre 13, 2007
1 comentari

Veiqui ‘na brava eidéia de present per nadau : los contes de Fèlix Arnaudin en bendas dessenhadas. A l’ora d’aura, la BD en lenga occitana nos perpausa subretot de las reviradas de las aventuras d’èros màger de l’escola franco-belga (Asterix, Yakari, Gaston Cofa) mai d’autras BD mens conegudas (Pòl-Emili, la Zòna Celesta, …).

Aquí, avem un projecte originau, çò que podem ‘pelar ‘na vertadiera BD occitana. Una BD originala perque es pas ‘na revirada. Una BD occitana perque es en lenga d’òc, de segur. Mas subretot perque es la transmission de la cultura populara gascona, reculida per Fèlix Arnaudin au sègle 19. Chasque conte es dessenhat per quauqu’un different. Ueit contes e ueit univers grafics differents. De la linha clara classica a las ombras chinesas de Benoît Frébourg mai lo gredonat de Julien Mollaud e las colors d’Emmanuel Moynot. E per los que comprenen pas l’occitan, lo texte originau d’Arnaudin es perpausat avant chasca BD.

‘Na brava iniciativa dau PNR de las Lanas de Gasconha mai dau edicions Petit à Petit. Espere que i aura d’autras creacions originalas en BD. Seria lo biais lo mai popular per reviscolar la cultura occitana.


Mandat dins libre

Ensemble tout simplement

decembre 5, 2007
Daissar un comentari

Un pauc de publicitat per un libre publicat per ‘n’amija. Qu’es un libre de fòtos, fach per tres mairs que cerchavan « l’épanouissement de leurs enfants dans le respect et le partage de moments de vie. » L’objectiu : que los pairs que viven ‘na relacion de proximitat coma lors pitits se troben dins queus libres mai que los qu’osan pas, s’autorizen los moments de complicitat.

Libre a 6,60 euros, sus papier reciclat, 14*14 cm, peliculat (oc-es, fau que los pitits lo pueschen ‘visar, ‘trapar…)

Per lo comandar, ne’n saubre mai e tot quò, i a un blòg : http://ensembletoutsimplement.unblog.fr/


Mandat dins amics,libre